نور صطوف: سوريا ولادة

بنظرة مليانة أمل وضحكة مليانة تفاؤل قال نور هالكلمة (سوريا ولّادة) والشعب السوري عندو كثير ليقدمو ويبدع في .

نور زياد صطّوف شاب سوري من محافظة إدلب ومثلو مثل كثير شباب الوضع والحرب أثرو على مستقبلو وأجبرو على السفر 

ولكن نور ابن 22 سنة ما سافر وقعد! بس تعب ع حالو وأبدع وصار إلو اسم ، نور اليوم بطل ألمانيا الإتحادية للعبة الشطرنج بالمستوى C وهوي بيلعب بنادي برايتن فوريس. هالشب قدر يثبت حالو ويوصل ويتغلب على كل المرشحين الألمان إلي لعبو ضدو وأثبت حالو وقدر يغير الصورة إلي البعض من الألمان اخذينا عنا …

بدأ نور اللعبة عام 2003 مع نادي العمال و بعام 2007 انتقل لنادي الشبيبة وعام 2009 أخذ بطولة أندية شبيبة سوريا وعام 2011 شارك ببطولة الجمهورية

بقول نور لدوبارة أول مبديت بنادي برايتن فوريس كانو مشككيين بقدراتي ولكن مع الوقت اقدرت أقنعهم إنو عنا شي وبعدها أخذت الكاس وعرفو كلن إنو السوري فعلا قادر إنو يكون حالو ويستمر رغم كل شي صار وبزيد كمان النجاح بغير كثير أفكار .

طالب الإقتصاد إلي وجهوو مفعم بروح الشباب أكد لدوبارة إنو التواصل مع الألمان شي كثير مهم لللأجئ السوري وطبعا حكا هالشي لأنو عايش هالتجربي وعرف إنو الألماني شخص رائع وبحب إلي عندو شي وحابب يقدمو وشخص بيمشي معك وبآمن بقدراتك وبوصلك لمبتغاك مندون مقابل وركز نور على مفهوم عدم إستغلال العلاقة لأنو استغلال العلاقة بأدي للفشل نحنا لازم نرافق ونصادق الألمان ونعرفن إننا شعب بحب الحياة وهالشي هوي الإندماج مو بس نتقن لغة كمان لازم نطور مهراتنا بالتعامل مع أهل البلد .

واعترف نور بالصعوبات إلي بتواجهو وأكد إنو البعد عن الاهل صعب بس مفهومو لهشي مختلف نور بقول إنو نحنا مجرد مأبدعنا ووصلنا وحققنا أهدافنا … أهلنا بسوريا رح يكونو بخير أكيد لأنو الخبر الحلو من هون هو عبارة عن دعم معنوي كبير بيرسم الضحكة على شفاف إمنا وبينا وبعرفن إن ولادن بخير وعم يعطو صورة حلوة عن أهلن وبلدن والخير إلي فيها .

نور بيعزف عود وبيانو كمان كشف لدوبارة عن طموحو الموسيقي وإلي حابب يكملو ويوصل لدرجات عالي من النجاح ويستغل كل فرصة ويجتاز كل عقبة بتوقف بطريقو ..

بكلمة أخيرة ختم هالشب المبدع كلامو لدوبارة وقال نحنا بسوريا خسرنا كثير مواهب بس كمان سوريا ولّادة وفي مبدعين كثير ونصح نور الشباب وقال الدول الآوروبية بترعا المواهب ولازم كل حدا عندو موهبة يصرح عنا ويشتغل عليها وما يخاف ولا يقول إنو هنن آوروبيين ومتميزين عنا بالعكس نحنا شعب عندو كثير ليقدمو.

#دوبارة #سوريا #سوريونمبدعون #ألمانيا #مبدعون